Падзеі і факты
5-10 верасьня 2005
ПРЭМ’ЕР — “ОТЛИЧНИК”
На сходзе крамлёўскай эліты Пуцін уручыў “отлічніку КГБ” Фрадкову-Фрадкіну (гэта ня жарт, “герой” валодае такой каштоўнай узнагародай) ордэн “За заслуги перед отечеством” другой ступені. Ардэнаносец ГБ прэм’ер РФ – краіны з мільёнамі наркаманаў, алкаголікаў, забойцаў, беспрытульных дзяцей, правалам ва ўсіх галінах дзейнасьці – з салодкай усьмешачкай прыняў яркую бляшку з рук свайго начальніка.
Усе пляскалі ў ладкі. Потым пайшлі да багатага стала і “подкрепілісь”. Гледзячы на ўсё гэта, успамінаюцца словы французкага амбасадара ў Пецярбурзе Палеялога. Француз пабыў на дварцовым прыёме на пачатку лютага 1917 г. і запісаў у дзёньнік: “Такое ўражаньне, што Расеяй кіруе група лунатыкаў…” Што было потым, мы ведаем.
ЛАТЫШЫ ГАСПАДАРЫ Ў СВАЁЙ ХАЦЕ
6 верасьня тэлеканал РТР паказаў рэпартаж з Латвіі. Колькі не выдрыгіваліся на вуліцах Рыгі “русскоязычные недоросли”, усім давялося ісьці ў школы з латышскай мовай навучаньня, каб ня быць вытураным у жудасную (такую родную) Расею. Яны, паводле інфармацыі РТР, адразу заняліся дадатковым навучаньнем “на дому” з дапамогай кампутара. Юнак з выразным прозьвішчам Халявін расказаў, як ён перавёў шэраг расейскіх падручнікаў у інтэрнэт, і цяпер разам з сябрамі пасьля заняткаў у латышскай школе з насалодай чытае ўрокі па-расейску. Вось яно й добра, вось і справядліва. Маскальскія акупанты, засяляючы сабой Латвію, думалі заштурхнуць у кут мясцовы люд, меркавалі прымусіць латышскіх школьнікаў вывучаць родную мову “на дому”. Ды з Божай ласкі атрымалася якраз наадварот. Як кажуць самы расейцы – “халява не прошла”…
ПАЛОМНІК ПУЦІН
10 верасьня расейская тэлевізія паказала жудасную сцэну. Прадстаўнік Сатаны цалаваў сьвяты абраз у кляштары на Афоне. Пуцін прыехаў у Грэцыю ды падаўся на сьвятую гару “у паломніцтва”. Бачна было, як ягоныя ахоўнікі нудзіліся і далонямі выціралі пот пад каўнярамі белых кашуляў. Лубянскі начальнік тэарэтызаваў наконт тэалёгіі і іконаграфіі. Хаця што там, ягоныя папярэднікі Дзяржынскі і Мянжынскі таксама лексікай, ня толькі наганам валодалі – усе вытанчаныя “рускія інтэлігенты”. Чаму ж тады пра пару гадзінаў РТР ужо не паўтарала сцэну з пуцінскім цалаваньнем абраза? Звыродлівае блюзьнерства сатаніста, пэўна, адэкватна ацанілі дзяжурныя іміджмэйкэры ды гаркнулі ў астанкінскай вежы: “Ну-ка вырезать..!” Беларусы павінны адэкватна ацаніць гэтыя пастаноўкі лубянскай самадзейнасьці. Вялікі папярэднік Пуціна – Іван Жахлівы вельмі любіў таксама пасьля масавых катаваньняў і забойстваў пайсьці ў РПЦ ды прыкласьціся да абразоў. Ведаем, якая страшная бяда была беларускаму народу ад гэтых усходнік сатаністаў-сьвятошаў. Нічога не зьмянілася. Ізноў трэба бараніцца нам ад маскоўскага кашмару, які прыкрываецца праваслаўем.
Валеры Буйвал
10 верасьня 2005
